Schloss Neuschwanstein

S Schloss Neuschwanstei staht oberhalb vo Hohenschwangau bei Fiassa im bayrische Allgai. Buut worden isch es ab 1869 für de bayrischi König Ludwig II. als idealisierti Vorstellig von ere Ritterburg us em Mittelalter. D Entwürf stammed vom Christian Jank, d Usfüehrig hend de Eduard Riedel und de Georg von Dollmann übernuu. De König het nume wenigi Mönet im Schloss gläbt. Er isch no vor de Fertigstellig vo dr Aalag gstorbe.

Neuschwanstei het ursprünglich Nüüi Burg Hohenschwangau gheisse, sy hütige Name träits syt 1886. Eigetümer vom Schloss isch de Fryystaat Bayern; luege tuet em di Bayrisch Verwaltig vo de staatliche Schlösser, Gärte und See.

De Ludwig II. het drü Schlösser la buue: Näbe Neuschwanstei sind das au Herrenchiemsee und Linderhof. Neuschwanstei, wo hüt hüüfig as „Määrlischloss“ gilted, isch s berühmtesti vo dene Schlösser und eini vo de bekannteste Sehenswürdigkeite vo ganz Dütschland. All Jahr chömed s öppe 1,5 Millione^[1] Touriste go aaluege. Neuschwanstei ist fast s ganze Jahr für d Bsuecher offe.^[2] D Architektur und Innenusstattig sind prägt vom romantischen Eklektizismus us em 19. Jahrhundert; s Schloss gilted als es Hauptwärch vom Historismus.

1. ↑ Söder erteilt Bauauftrag für Sanierung des Torbaus in Schloss Neuschwanstein Prässemitteilig uf schloesser.bayern.de vom 13. Juli 2016
2. ↑ Informationen für Besucher uf neuschwanstein.de abgrüeft am 6. März 2021